Göygöl rayonu Çaylı kənd tam orta məktəbində qalmaqallı vəziyyət yaranıb.
Gencexeber.az-a daxil olan şikayətlərə əsasən, bir qrup valideyn məktəbin direktoru Aqif Hüseynovun şagirdlərə qarşı qərəzli münasibət göstərdiyini iddia edir.
Çaylı kənd sakini Eşqin Nəbiyev redaksiyamıza müraciət edərək bildirib ki, onun 7-ci sinifdə oxuyan oğlu məktəb direktoru tərəfindən məqsədli şəkildə sinifdə saxlanılıb. Valideynin sözlərinə görə, qərəzin konkret səbəbi ona məlum olmasa da, imtahanlardan öncə direktorun müəllimlərə bəzi şagirdlərin, o cümlədən onun oğlunun sinifdə saxlanılacağını bildirdiyi iddia edilir.
Eşqin Nəbiyev qeyd edir ki, bu proses çərçivəsində bəzi uşaqlara real biliklərindən aşağı qiymət yazılması ilə bağlı göstəriş verilib.
Valideyn məsələ ilə bağlı əvvəlcə Göygöl Təhsil Şöbəsinə, daha sonra isə Gəncə-Daşkəsən Regional Təhsil İdarəsi və digər aidiyyəti qurumlara rəsmi müraciət etdiyini bildirir. Onun sözlərinə görə, şikayət məktubundan sonra məktəbə komissiya göndərilib və şagirddən yenidən imtahan götürülüb.
Lakin ata iddia edir ki, verilən vədlərə baxmayaraq nəticə dəyişməyib və uşaq sinifdə saxlanılıb.
İki əkiz övlad atası olan Eşqin Nəbiyevin uşaqlarından biri təhsilini davam etdirmək üçün kilometrlərlə uzaqda yerləşən başqa kənd məktəbinə getməyə məcbur qalıb. Bu isə ailə üçün əlavə maddi və psixoloji çətinliklər yaradıb.
Məsələnin digər tərəfi isə daha ciddi iddia ilə bağlıdır. Valideyn və bəzi sakinlər məktəb direktorunun şagirdlərə qarşı fiziki güc tətbiq etməsi ilə bağlı narahatlıqlarını dilə gətiriblər.
Gencexeber.az tərəfindən Gəncə-Daşkəsən Regional Təhsil İdarəsinə göndərilən sorğuya cavab olaraq qurumdan Göygöl rayon Çaylı kənd tam orta məktəbinin 3 nəfər 7-ci sinif şagirdinin 2024-2025-ci tədris ilinin yekununda məktəbdaxili qiymətləndirməyə əsasən sinifdə saxlanılması təsdiqlənib:
"Gəncə-Daşkəsən Regional Təhsil İdarəsinin əməkdaşları tərəfindən tədris ili üzrə qiymətləndirmə nəticələri ilə bağlı əlavə araşdırma aparılıb, qiymətləndirmə materialları və təlim nəticələri yenidən təhlil olunub.
Şagirdlərin akademik göstəricilərinin dinamikası nəzərə alınmaqla yekun qərarın qəbul edilməsi nəzərdə tutulub".
