Bu il aprelin 30-da "MedAura" klinikasında burun əməliyyatı zamanı koma vəziyyətinə düşən Şəmkir rayonundan olan Nigar İlham qızı Budaqlının görüntüləri günlərdir sosial şəbəkədə müzakirə edilir. Qızın ailəsi onun həkim ehtiyatsızlığı ucbatından komaya düşdüyünü bildirib.
Nigarın bacısı İlahə Budaqova axşam.аz-a açıqlamasında bacısının durumundan danışıb. O, lor-cərrah Yaqub Əsədi və anestezioloq Cəmilə Əliyevanı təqsirləndirib:
"Bacım burun əməliyyatı olunmuşdu, sonra nəfəs almasında problem yarandı. Həkim dedi ki, get, bir neçə ay keçsin gələrsən. Bir neçə ay sonra - aprelin 30-da ikinci dəfə əməliyyata girib. Narkozu verəndə bacım komaya düşüb. Heç əməliyyat etməyiblər, kliniki ölüm vəziyyətinə düşüb. Orada nə baş verib, bilmirik. Xəstəxana əməkdaşları bir müddət bizə heç nə demədi. Sonra görüblər ki, vəziyyət pisdir, bizi çağırdılar. Getdik ki, bacım qalıb ortada, xəstəxanada reanimasiya şöbəsi yoxdur. Təcili yardımlar gəldi, heç bir klinika bacımı qəbul etmirdi. Yalvarıb onu bir klinikaya yerləşdirdik. 2 ay orada qaldı, amma yenə buraxdılar. Evimizi satdıq, gəlib Bakıda kirayədə qalırıq. Pulumuz həkimlərə getdi. Nə qədər tibb bacısına borcumuz var. Həkimlər deyir ki, sağalması uzun müddət tələb edir. Həm pul, həm yaxşı həkimlər lazımdır".
İlahə Budaqova bildirib ki, bacısını o günə salan Yaqub Əsədi və Cəmilə Əliyeva heç onunla maraqlanmır:
"Heç maraqlanmırlar ki, necə olub. Yaqub Əsədi atır narkoz həkimi Cəmilənin üstünə. Cəmilə deyir prokuror qızıyam, kimsə mənə bir şey edə bilməz. Vəkil tutmuşuq, hər yerə şikayət etmişik. Amma məsləyə baxan yoxdur".
Ailə deyir ki, ekspert rəyində həkimlərin təqsirli olduğu sübutunu tapıb. Amma klinika, əməliyyatı icra edən həkim və anestezioloq dəymiş ziyanı üzərinə götürmür.
Redaksiya tərəfindən məsələ ilə bağlı Yaqub Əsədi ilə əlaqə saxlamaq cəhdi uğursuz olub. Sosial şəbəkədəki profilində isə o, işinin başında olduğunu, əməliyyatlar icra etdiyi görüntüləri yayımlayır.
