Cənubi Koreyada uzun illər yaşayan və təhsil alan şəmkirli fəlsəfə doktoru Leyla Məsimli iki ölkə arasında mədəni və akademik əməkdaşlığın inkişafına verdiyi töhfələrə görə Seul şəhərinin fəxri vətəndaşı adına layiq görülüb.
AZƏRTAC xəbər verir ki, Leyla Məsimli 2025-ci ildə bu ada layiq görülən 17 nəfərdən biridir.
Həmvətənimiz həm magistratura, həm də doktorantura təhsilini Koreyada aldıqdan sonra Seulda akademik fəaliyyətlə məşğuldur. O, Avrasiya–Türk Araşdırmaları İnstitutunda tədqiqatçı kimi çalışıb. Hazırda İnha Universitetində Azərbaycan multikulturalizmi fənnini tədris edir.
O, Azərbaycan Diasporuna Dəstək Fondunun dəstəyi ilə yazıçı Yu Su-jin ilə birlikdə ötən il Azərbaycan xalq nağıllarından 7 hekayəni Koreya dilinə tərcümə edib. Bu il isə Azərbaycan Diasporuna Dəstək Fondunun dəstəyi ilə "Kitabi-Dədə Qorqud" dastanının 6 boyunu yazıçı Yu Su-jin ilə birlikdə Koreya dilinə çevirib.
Qeyd edək ki, "Seul fəxri vətəndaşı" titulu şəhərin inkişafına və yerli əhalinin həyat keyfiyyətinin yüksəlməsinə mühüm töhfə verən xarici vətəndaşlara təqdim olunur. Sertifikat Seul merinin rəsmi imzası ilə verilir və sosial rifah, mədəniyyət, iqtisadiyyat, təhsil və ekoloji inkişaf kimi sahələrdə xüsusi nailiyyət göstərmiş şəxsləri əhatə edir. 1958-ci ildən tətbiq olunan bu fəxri ada indiyədək 100 ölkədən 968 nəfər layiq görülüb.
