Birinci Qarabağ müharibəsində itkin düşən şəhid Yolçu Sarı oğlu Məmmədovun nəşinin qalıqları 34 ildən sonra doğulduğu Şəmkir rayonunda torpağa tapşırılıb.
Gencexeber.az xəbər verir ki, şəhidin nəşinin qalıqları bu gün Şəmkir rayonunun Seyfəli kəndinə gətirilərək ailəsinə təhvil verilib. Kənddə şəhidin qarşılanma və vida mərasimi keçirilib.
Mərasimdə rayon rəhbərliyi, ictimaiyyət nümayəndələri, hərbi qulluqçular, rayon sakinləri və şəhidin doğmaları iştirak ediblər. Cənazə namazı qılındıqdan sonra şəhid Yolçu Məmmədov Seyfəli kəndindəki Şəhidlər xiyabanında torpağa tapşırılıb.
Qeyd edək ki, Yolçu Sarı oğlu Məmmədov 1966-cı ildə Şəmkir rayonunun Seyfəli kəndində anadan olub. O, 1992-ci ilin iyun ayında könüllü olaraq Qarabağ döyüşlərinə qatılıb. Elə həmin ilin 13 iyun tarixində Ağdərə rayonunun Sırxavənd kəndi istiqamətində gedən döyüşlərdə itkin düşüb.
Şəhid Yolçu Məmmədov ailəli idi.
Allah rəhmət eləsin.
