Bəzən şahid qismində məhkəməyə və ya istintaqa çağırılan şəxslər səfər xərclərini qarşılaya bilmir və bir sıra problemlər yaranır.
Bununla bağlı vətəndaşların belə vəziyyətdə hansı hüquqları və nə etməli olduqları suallarına aydınlıq gətirəcəyik.
Şahid məhkəməyə və istintaqa gəlməyə pulu yoxdursa, nə etməlidir?
Cebheinfo.аz xəbər verir ki, vəkil Vamiq Şükürov bu barədə danışıb.
O bildirib ki, hər hansı cinayət və ya mülki işlərə baxılan zaman biz şahid qismində məhkəmə və ya istintaq orqanına çağırılırıq:
"Şahidlik etmək şəxsən bizə hər hansı maddi üstünlük vermir. Əksinə, şahidlik etmək üçün məhkəməyə və ya istintaq orqanına gedərkən nəqliyyat, otel və yemək xərcləri çəkmiş oluruq. Qanunlara əsasən şahidin cinayət və ya mülki prosesi zamanı sərf etdiyi xərclərin ödənilməsinə görə kompensasiya almaq lazımdır.
Azərbaycan Respublikasının ərazisində ezamiyyə xərclərinin 1 günlük norması Bakı şəhərində 90,0 manat, Gəncə, Sumqayıt və Naxçıvan şəhərlərində 70,0 manat, respublika tabeli digər şəhərlərdə, rayon mərkəzlərində, şəhər tipli qəsəbələrdə və kəndlərdə 65,0 manat müəyyən edilib.
Şahidlərə məhkəməyə gəlməklə əlaqədar ödənilən məbləğ onlar öz vəzifələrini yerinə yetirdikdən sonra məhkəmə tərəfindən depozit hesabından verilir".
