Samux rayonunun Tatlı kənd tam orta məktəbində istilik problemi səbəbindən şagirdlərin 10 gündən artıqdır dərsə getmədiyi iddia olunur.
Gencexeber.az-a daxil olan məlumata görə, təhsil müəssisəsində istilik sistemində yaranan problem həm şagirdlərin, həm də valideynlərin ciddi narahatlığına səbəb olub. Bildirilir ki, məktəbdə bəzi günlərdə müəllimlərin də əksəriyyəti dərsə gəlməyib.
İddialara əsasən, məktəbdə mavi yanacağın verilişində problem yaranıb. Sakinlər bildirirlər ki, səbəb kimi sayğaca ödəniş edilməməsi göstərilir. Nəticədə məktəbin qızdırılması mümkün olmayıb və bu vəziyyət şagirdlərin tədrisdən kənarda qalmasına səbəb olub.
Qeyd edək ki, Tatlı kənd tam orta məktəb son iki ilə qədər odunla qızdırılıb. Daha sonra təhsil müəssisəsinə qaz xətti çəkilsə də, hazırda istilik təminatında yenidən problem yarandığı bildirilir.
Valideynlər çıxılmaz vəziyyətdə olduqlarını deyirlər. Onların sözlərinə görə, aidiyyəti qurumlara müraciət edilsə də, məsələ uzun müddət həllini tapmayıb. Məktəbdə yüzdən artıq şagird təhsil alır.
Məsələ ilə bağlı Gəncə-Daşkəsən Regional Təhsil İdarəsindən bildirilib ki, Samux rayon Tatlı kənd tam orta ümumtəhsil məktəbində istilik təminatında fasilə texniki məsələlərlə bağlı yaranıb:
"Həyata keçirilmiş zəruri tədbirlər nəticəsində problem aradan qaldırılıb və hazırda təhsil müəssisəsinin istiliklə təchizatı müvafiq qaydada həyata keçirilir. Qeyd edirik ki, ölkə ərazisində fəaliyyət göstərən ümumi və məktəbəqədər təhsil müəssisələrinin mərkəzləşdirilmiş qaydada və müxtəlif vasitələrlə (odun, dizel, elektrik radiatoru) istilik mövsümünə hazır vəziyyətə gətirililməsi prosesi təmin olunur".
