Gəncədə şəhidlə vida mərasimi baş tutub. Bu haqda 18 iyul tarixində Apa-ya istinadən məlumat veririk.
Söhbət Birinci Qarabağ müharibəsində itkin düşdüyü ehtimal edilən, 31 ildən sonra kimliyi müəyyənləşdirilən Akif İlyas oğlu Abbasovdan gedir. Şəhidin nəşinin qalıqları ailəsinə təhvil verilib.
Daşkəsən rayonunun Əhmədli kənd sakini olan Abbasovla orada vida mərasimi keçirilib. Sonra şəhidin nəşinin qalıqları Gəncə Şəhidlər xiyabanında torpağa tapşırılıb. Mərasimdə Daşkəsən rayon İcra Hakimiyyətinin başçısı Orxan Abbasov, Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki baş konsulu Rəcəb Öztop, rayonun hüquq-mühafizə orqanlarının rəhbərləri, idarə, müəssisə və təşkilatların kollektivləri, ictimaiyyət nümayəndələri, şəhidin yaxınları, şəhid ailələri, müharibə veteranları və əlilləri, rayon sakinləri və KİV nümayəndələri iştirak ediblər.
Qeyd edək ki, şəhid Akif İlyas oğlu Abbasov 1 iyul 1970-ci ildə Daşkəsən rayonunun Əhmədli kəndində dünyaya göz açıb. 28 dekabr 1993-cü ildə Ağdərə rayonunun Salahlı kəndi ərazisində erməni silahlı dəstələri ilə gedən döyüşlərdə hərbi xidməti borcunu yerinə yetirərkən şəhid olub.
Akif Abbasov Bərdə Şəhidlər xiyabanında naməlum şəhid kimi dəfn edilib. Bir qədər əvvəl isə onun kimliyi müəyyən olunub.
