Tovuz rayonunda qumar oynayan şəxs inzibati məsuliyyətə cəlb edilib.
Teleqraf.аz xəbər verir ki, Tovuz rayon sakini, 2002-ci il təvəllüdlü Vaqif Vəliyev (ad-soyad şərti verilib – red.) Tovuz rayonunun Aşağı Öysüzlü kəndində həmkəndliləri, eyni zamanda qohumu olduğu iki nəfərlə birlikdə pul qazancı müqabilində qumar oyununda iştirak edib. O, kartla qumar oynayıb.
İş üzrə inzibati məsuliyyətə cəlb olunan Vəliyevin sözlərinə görə, rəsmi olaraq heç bir yerdə işləmir.
Bildirib ki, qohumu Nərimanın övladının kiçik toy məclisindən əvvəl həmkəndliləri və qohumları – Aydın və Elmar ilə birlikdə məclisin keçirilməsi ilə əlaqədar işlərə kömək etmək məqsədi ilə onun evində olublar:
"Həmin gün, gecə saatlarında Aydın və Elmar ilə birlikdə pul qazanmaq məqsədilə kart oynadıq. Həmin vaxtı ev sahibi Nəriman "TikTok" sosial şəbəkəsində canlı yayım açaraq qumar oyununu efirə verdi. Daha sonra 3 nəfər polis əməkdaşı evə gələrək qumar oyununu aşkar etdi".
Vəliyevin barəsində İnzibati Xətalar Məcəlləsinin 525-ci (qumar oyununda iştirak etmə) maddəsi ilə ittiham elan edilib.
Tovuz Rayon Məhkəməsinin qərarı ilə Vaqif Vəliyev 3 min manat miqdarında cərimə olunub.
