Son zamanlar paytaxtda və bir sıra böyük şəhərlərdə qəbiristanlıqlarda qiymətlərin artdığı və yer tapmağın çətinləşdiyi müşahidə olunur. Qəbir yerlərinin azlığı, tələbatın çoxalması və bu sahədəki alqı-satqı halları vəziyyəti daha da gərginləşdirib. Bəzi insanlar sağlığında qəbiristanlıqlarda yer zəbt etdiyi üçün bu da müəyyən mənada əlavə problemlərə səbəb olur.
Xatırladaq ki, bir müddət əvvəl Milli Məclisin Regional məsələlər komitəsində keçirilən iclasda da qəbiristanlıq mövzusu müzakirə edilib.
Mövzu ilə bağlı modern.аz-a danışan Milli Məclisin İctimai birliklər və dini qurumlar komitəsinin sədri Fazil Mustafa bildirib ki, əslində, qəbiristanlıqlarda yer çatışmazlığının bu qədər böyük problemə çevrilməsinin əsas səbəbi tənzimlənmə məsələsində dəqiqliyin olmamasıdır.
"İlk növbədə qeyd edim ki, qəbiristanlıqların idarə edilməsi bələdiyyələrin səlahiyyətinə verilib. Lakin bələdiyyələrin maliyyə və texniki imkanları məhdud olduğu üçün, onlar bu məsuliyyəti tam şəkildə daşımaqda maraqlı görünmürlər.
Bu sahəyə nəzarət və tənzimləmə prosesi həm müvafiq icra orqanları, həm də yerli icra hakimiyyətləri üçün çətinləşib. Mənim fikrimcə, qəbiristanlıqları şəhər ərazisindən kənara çıxarmaq vacibdir. Onlar şəhərə tam yaxın məsafədə olmasa da, insanların rahat şəkildə gedib-gələ biləcəyi ərazilərdə yerləşdirilməlidir".
Deputat həmçinin qeyd edib ki, şəhər qəbiristanlıqlarında yer qalmadığı üçün insanlar ciddi çətinliklərlə üzləşir, hətta, ziyarət zamanı da avtomobillərini uzaqda saxlayıb, piyada getməyə məcbur qalırlar:
"Buna görə də, konkret qərarlar qəbul edilməli, şəhərdənkənar, istifadəyə yararsız və aqrotexniki baxımdan dəyər daşımayan torpaq sahələri qəbiristanlıq kimi ayrılmalıdır.
Belə ərazilər kifayət qədər çoxdur və onların bu məqsədlə istifadəyə verilməsi həm şəhərin planlaşdırılması baxımından, həm də vətəndaşların rahatlığı üçün daha doğru addım olar".
