Qazax rayonunun işğaldan azad edilmiş ərazilərində 243 ha ərazi minalardan təmizlənib.
Apa.аz-a bu barədə ANAMA-dan məlumat verilib.
Məlumata görə, Qazax rayonunun işğaldan azad edilmiş ərazilərində 2024-cü ilin aprel ayından etibarən minatəmizləmə fəaliyyəti icra edilir. İcra edilən əməliyyatlar zamanı 243 ha ərazi təmizlənib, 1 065 ədəd piyada əleyhinə mina, 108 ədəd tank əleyhinə mina və 54 ədəd partlamamış hərbi sursat aşkar edilərək zərərsizləşdirilib.
Bildirilib ki, qeyd edilmiş ərazilərdə həm relyef çətinliyi, həm də minalarla yüksək səviyyədə çirklənmə mövcuddur. Təmizləmə əməliyyatları zamanı daha çox piyada əleyhinə minalara rast gəlinir.
