Goranboy rayonunda 1993-cü il təvəllüdlü Fərman qısqanclıq zəminində 1987-ci il təvəllüdlü bacısı Almazı (adlar şərtidir – red.) öldürməyə cəhd edib.
Teleqraf.аz xəbər verir ki, o, bacısının kənddə Telmanla münasibətdə olduğunu və hamilə qaldığını öyrənib.
Bu il mayın 31-də gecəyarısı işlədiyi Ağdam rayonundan Goranboyun kəndinə, Almazın yaşadığı evə gəlib. Səhər saatlarınadək ağaclıqda gözləyib, anası İlhamənin və Almazın uşaqlarının evdən çıxdığını gördükdə bacısının evdə tək qaldığına əmin olub. Sonra evə daxil olub, bacısının yatdığı otağa girib, hamilə olduğunu bildiyi halda bıçaqla ona bir zərbə endirib.
Ancaq bıçağın daxilə nüfuz etmədiyini görüb, onun saçından tutaraq boğaz nahiyəsinə iki ardıcıl zərbə endirib. Qadının öldüyünü zənn edərək həyətə çıxıb. Bu vaxt Almazın həyətə çıxaraq qaçdığını görüb. Bacısını arxadan tutaraq yerə yıxıb, boynunu sındırmaq məqsədilə əlləri ilə burub.
Almazın yerə yıxılaraq xırıltı səsləri çıxardığını gördükdə onun öldüyünü zənn edib. Daxili İşlər Nazirliyinin "102" qaynar xəttinə zəng edib və bacısını öldürdüyünü bildirib. Hadisə yerinə gəlmiş polis əməkdaşlarının müraciəti əsasında Almaz vaxtında tibb müəssisəsinə çatdırılıb və həyatı xilas edilib.
İstintaq orqanı tərəfindən Fərmanın barəsində Cinayət Məcəlləsinin xüsusi amansızlıqla və ya ümumi təhlükəli üsulla adam öldürməyə cəhd və təqsirkar şəxs üçün aşkar surətdə hamilə vəziyyətində olan qadını öldürməyə cəhd maddələri ilə ittiham elan edilib.
Cinayət işi üzrə ifadə verən Fərman ona elan olunmuş ittiham üzrə özünü təqsirli bilib.
Məhkəmə sənədlərindən məlum olub ki, Almaz bu hadisədən sonra bətnində olan uşağını itirib.
Bu cinayət işinə Gəncə Ağır Cinayətlər Məhkəməsində baxılıb. Fərman 11 il 6 ay müddətə azadlıqdan məhrum edilib, cəzasını ciddi rejimli cəzaçəkmə müəssisəsində çəkməsi müəyyən edilib.
Hökmdən məhkumun müdafiəçisi apellyasiya şikayəti verib. O, məhkumun əməlinin Cinayət Məcəlləsinin qəsdən sağlamlığa ağır zərər vurma maddəsinə tövsif edilməsini və məhkuma həmin maddə ilə minimum həddə cəza təyin edilməsini xahiş edib.
Təqsirləndirilən şəxsin ilk dəfə məhkum olunduğunu vurğulayan vəkil onun 2-ci Qarabağ müharibəsində iştirak etdiyini, anasının bir neçə ağır xəstəlikdən əziyyət çəkdiyini də diqqətə çatdırıb.
Bu şikayətə Gəncə Apellyasiya Məhkəməsində baxılıb. Təqsirləndirilən şəxsin cəzası 11 il 3 aya endirilib.
