2024-cü il iyulun 1-də Binəqədi rayonunun Rəsulzadə qəsəbəsində, İlham Hacıyev küçəsindəki mənzillərdən birində əslən Şəmkir rayonundan olan 2004-cü il təvəllüdlü Təhminə Qasımovanın meyiti tapılıb. Ekspertiza onun boğularaq qətlə yetirildiyini müəyyən edib.
Baku TV xəbər verir ki, hadisə ilə bağlı Cinayət Məcəlləsinin qəsdən adam öldürmə maddəsi ilə cinayət işi başlanıb.
Təhminə Qasımovanı öldürməkdə təqsirləndirilən Təbriz Qasımov ifadəsində bacısını qısqanclıq zəminində qətlə yetirdiyini bildirib. O, bacısının ailənin razılığı olmadan iki dəfə qeyri-rəsmi münasibətdə yaşadığını və hər münasibətdən bir övladı olduğunu deyib.
Məlumata görə, 2023-cü ildə Təhminə sonuncu dəfə yaşadığı şəxsdən də ayrılaraq Şəmkirə anasının yanına gedib. Təbriz isə bacısının bu hərəkətlərinə görə ona nifrəti olduğundan qardaşı ilə birlikdə Bakıya gəlib, kirayə ev tutub, işləməyə başlayıb. Daha sonra anası və bacısı Təhminə də Bakıya gələrək Binəqədi rayonunun Rəsulzadə qəsəbəsində ev kirayə tutublar.
Təbrizin bacısı ilə münasibəti olmasa da, qardaşı vasitəsilə öyrənib ki, bacısı mütəmadi olaraq işdən evə gec gəlir. Bundan sonra o, bacısını öldürməyə qərar verib.
Hadisə gecə saat 4 radələrində baş verib — Təbriz mənzilə daxil olaraq yatmış bacısını dəsmalla boğub. Daha sonra yaxınlıqdakı polis bölməsinə gedərək cinayəti etiraf edib.
Məhkəmə onu 15 il müddətinə azadlıqdan məhrum edib.
