Gəncədə sərnişin daşımalarının keyfiyyətinin artırılması məqsədilə "BakuBus" MMC sentyabrın 28-dən etibarən fəaliyyətə başlayıb. Gəncə Beynəlxalq Avtovağzalının arxa hissəsində şirkət üçün geniş ərazidə müasir avtobus parkı inşa edilib və yenilənmiş 20 marşrut xəttinə 280 ədəd EURO6 standartına cavab verən avtobus istismara verilib.
Gencexeber.az məlumat verir ki, ictimai nəqliyyatda qadın sürücülərin sayını artırmaq məqsədilə Azərbaycan Yerüstü Nəqliyyat Agentliyi (AYNA) tərəfindən xüsusi təlim proqramı həyata keçirilir. Artıq bu gündən Bakıda iki xanım "BakuBus" MMC-də sürücü kimi rəsmi fəaliyyətə başlayıb.
Redaksiyamıza müraciət edən Gəncə sakinlərinin əksəriyyəti bu addımı müsbət qarşılayıb. Onların sözlərinə görə, bu təşəbbüs paytaxtdan sonra Gəncədə də tətbiq olunsa, şəhərin nəqliyyat mühitində mühüm dəyişikliklər yarada bilər.
Xanım sakinlərdən biri bildirib ki, qadınların bu sahədə iştirakı uzun müddətdir gözlənilən addım idi:
"Biz illərdir ictimai nəqliyyatda nizam-intizamın və xidmət mədəniyyətinin daha yüksək olmasını istəyirik. Xanım sürücülərin işə başlaması bu sahəyə tamamilə yeni yanaşma gətirə bilər. Əgər Bakıda mümkündürsə, niyə Gəncədə olmasın?"
Digər xanım izləyicimiz isə təhlükəsizlik baxımından qadın sürücülərə daha çox güvəndiyini deyib:
"Məncə, qadınlar daha diqqətli və məsuliyyətli olurlar. Xanım sürücülərin işə başlaması sərnişinlər — xüsusən də qadınlar və uşaqlar üçün daha rahat mühit yarada bilər. Gəncədə də belə bir layihənin tətbiq olunmasını çox istərdim."
Qeyd edək ki, "BakuBus" MMC-nin fəaliyyətə başlaması ilə bağlı əvvəllər də bir neçə nəfər redaksiyamızla əlaqə saxlayaraq bu sahədə işləmək istədiyini bildirib.
