Gəncə Ağır Cinayətlər Məhkəməsində qəsdən sağlamlığa ağır zərər vurma, qanunsuz olaraq odlu silah saxlama, hakimiyyət nümayəndəsinə qarşı müqavimət göstərmə və ya zor tətbiq etmədə təqsirləndirilən Elman Cəfərovun cinayət işi üzrə məhkəmə istintaqı başa çatıb.
Gencexeber.az-ın məlumatına görə, hakim İlkin İbişovun sədrliyi ilə keçirilən prosesdə hökm oxunub.
İttihama görə, hadisə 2021-ci il iyulun 18-də Gədəbəy rayonu, Şəkərbəy kəndindəki çayxanada qeydə alınıb. Belə ki, Elman Cəfərov mübahisə zamanı həmkəndlisi, zərərçəkmiş Elburus Hüseynovun sifət nahiyəsinə qəsdən yumruqla vuraraq ona xəsarət yetirib. Bundan başqa, o, Gədəbəy RPŞ əməkdaşları tərəfindən evdə saxlanılarkən odlu silahla müqavimət göstərib. Polis əməkdaşlarının çevikliyi nəticəsində silahlı müqavimət cəhdinin qarşısı alınıb. Axtarış zamanı Elman Cəfərovun yaşadığı evin yataq otağından döyüş sursatları aşkar edilərək götürülüb.
Elman Cəfərovun məhkəmədə verdiyi ifadəyə əsasən, Elburus Hüseynov bunlar oturduğu kafenin qapısını təpiklə açaraq ona yaxınlaşıb. Daha sonra "nərdtaxta"nın daşını onun üzərinə atıb masanı dağıdıb və onlara "Siz kimsiz? Lotusuz?" deyə bildirib. Elə bununla da mübahisə şiddətlənib və qeyd olunan hadisə baş verib.
Gəncə Ağır Cinayətlər Məhkəməsinin hökmü o, 4 il 6 ay müddətinə azadlıqdan məhrum edilib. Hökmdən narazı qalan məhkum apellyasiya şikayəti verib. Gəncə Apellyasiya Məhkəməsində keçirilən prosesdə dövlət ittihamçısı şifahi vəsatətlə çıxış edib. O bildirib ki, cinayət işini materiallarından məlum olur ki, birinci instansiya məhkəməsində işə baxılarkən Cinayət Prosessual Məcəlləsinin bir neçə maddəsinin tələbləri kobud şəkildə pozulub. Ona görə də, o, məhkəmə kollegiyasından qanuna müvafiq qərar qəbul edilməsini, yəni birinci instansiya məhkəməsinin hökmünün ləğv edilməsi, cinayət işinin birinci instansiya məhkəməsinə yeni məhkəmə baxışına göndərilməsini xahiş edib. Qərara əsasən, apellyasiya şikayətinə baxılmasına xitam verilib, Gəncə Ağır Cinayətlər Məhkəməsinin hökmü ləğv edilib, cinayət işi birinci instansiya məhkəməsinə yeni məhkəmə baxışına göndərilib. Təqsirləndirilən şəxs barəsində seçilmiş həbs qətimkan tədbiri dəyişdirilməyib.
Gəncə Ağır Cinayətlər Məhkəməsinin budəfəki hökmü ilə Elman Cəfərov 3 il 5 ay 28 gün müddətə azadlıqdan məhrum edilib.
Fidan İlqar
