2025-ci il ərzində "Space TV", "ARB", "Xəzər TV", "MTV", "ATV", "ARB Xəbər", "Baku TV" kanallarının hərəsinə bir dəfə olmaqla ümumi 7 xəbərdarlıq edilib.
Apa.аz-a bu barədə Audiovizual Şuradan məlumat verilib.
Bildirilib ki, "MTV" və "Dünya TV" kanallarının yayımı hərəsi 3 saatlıq, "Kanal S"in yayımı 24 saatlıq, "Space TV"nin yayımı 6 saatlıq olmaqla ümumi 4 yayımın dayandırılması qərarı qəbul edilib.
Bundan əlavə, "MTV" kanalının aid olduğu "Muz TV Azərbaycan" MMC-nin üç min manatdan dörd min manatadək məbləğdə cərimə edilməsi ilə bağlı protokol tərtib olunub.
Keçən il ərzində "Media haqqında" Qanunun 32.4-cü maddəsinin tələblərini yerinə yetirmədiyinə görə 11 operatorla bağlı inzibati cərimə protokolu tərtib olunaraq müvafiq məhkəmələrə göndərilib. Keçirilmiş məhkəmə baxışları nəticəsində bütün yazılmış protokollar məhkəmələr tərəfindən təmin olunub və operatorların hər biri 5000 manat cərimə olunub.
