Gəncə şəhər sakininin evində doğması tərəfindən oğurluq baş verib. Bu haqda 25 iyul tarixində Oxu.az-a istinadən xəbər veririk.
Şəhər sakini Ayxan Əliyev cari ilin iyun ayının 2-dən 3-nə keçən gecə nənəsi Sədaqət Dilavər qızı Cəlaliyə məxsus fərdi yaşayış evindən oğurluq edib. O, ümumi dəyəri 102 110 manat olan qızıl-zinət, məişət və elektronika əşyalarını oğurlayaraq müxtəlif şəxslərə satıb.
İş üzrə Baş Polis İdarəsində cinayət işi başlanılıb. Əməli törətməkdə şübhəli bilinən A.Əliyev saxlanılıb. İstintaq zamanı oğurlanan əşyaların bir qisminin yeri polis əməkdaşları tərəfindən müəyyən edilərək zərərçəkənə qaytarılıb. Məhkəmənin qərarı ilə şəxs barəsində həbs qətimkan tədbiri seçilib.
Qeyd edək ki, Sədaqət Cəlali evindən oğurluq edilməsi barədə polisə şikayət edərkən iddia edib ki, öz qonşuları nəvəsinin psixoloji problemlərinin olmasından istifadə edərək, evindəki əşyaları oğurlayıblar. Məsələ ilə bağlı Daxili İşlər Nazirliyinin Mətbuat Xidmətinin regional qrupu bildirib ki, nənənin nəvəsinin psixoloji problemlərinin olması və kimlərinsə təhriki ilə oğurluq etməsi barədə dedikləri həqiqətə uyğun deyil.
A.Əliyevin araşdırma zamanı hər hansı bir fiziki və ya psixoloji problemi müəyyən edilməyib və əvvəllər də oğurluq etdiyinə görə məhkum olunub.
