Ali Məhkəmədə dələduzluqda təqsirləndirilən Səbuhi Əsmanzadənin barəsindəki kassasiya şikayətinə baxılıb.
Pravda.аz xəbər verir ki, hakim İlqar Cəfərovun sədrliyi ilə keçirilən prosesdə qərar elan olunub.
İttihama görə, Səbuhi Əsmanzadə "Instagram" sosial şəbəkəsində şəklini yerləşdirdiyi mebel dəstini satacağı barədə yalan məlumat verərək 9 zərərçəkmişə qarşı 12 362 manatlıq dələduzluq edib.
Gəncə Şəhər Məhkəməsinin hökmü ilə ona bəraət verilmişdi. Hökmdən narazı qalan dövlət ittihamçısı apellyasiya protesti və zərərçəkmişlər apellyasiya şikayəti vermişdi.
Gəncə Apellyasiya Məhkəməsinin qərarına əsasən, protest və şikayət qismən təmin edilib, Gəncə Şəhər Məhkəməsinin çıxardığı bəraət hökmü ləğv olunub, iş üzrə ittiham hökmü çıxarılıb. Belə ki, Səbuhi Əsmanzadəyə 3 il 4 ay 26 gün müddətinə azadlığın məhdudlaşdırılması (elektron qolbaq) cəzası verilib.
Ali Məhkəmənin qərarına əsasən, kassasiya şikayəti təmin edilməyib.
