Gəncə Apellyasiya Məhkəməsində yol qəzası törətməkdə təqsirləndirilən Namiq İsayevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.аz xəbər verir ki, sonuncu keçirilən prosesdə qərar elan edilib.
Qərara əsasən, apellyasiya şikayəti təmin edilib, Gəncə Şəhər Məhkəməsinin hökmü apellyasiya şikayətinə əsasən cəzaya aid hissdə dəyişdirilib. Həmin hökmlə təqsirləndirilən şəxsə təyin edilmiş 3 il müddətinə azadlıqdan məhrumetmə cəzası şərti hesab olunub.
İttihama görə, hadisə 2024-cü ildə Gəncə şəhəri ərazisində qeydə alınıb.
Belə ki, Namiq İsayev idarə etdiyi "Daewoo Nexia" markalı avtomobillə Gəncə şəhəri Nəriman Nərimanov prospekti ilə Gülüstan qəsəbəsi istiqamətində hərəkətdə olub. Sürücü Rüstəm Allahverdi oğlu və Vaqif Qəmərli küçələrinin kəsişmə hissəsindən keçərkən yol hərəkəti qaydalarının tələblərini pozub.
İstintaq materiallarına əsasən, təqsirləndirilən şəxs diqqətsiz yanaşma və ehtiyatsızlıq nəticəsində lazımi təhlükəsizlik tədbirlərini yerinə yetirməyib və yolu keçmək istəyən piyada Gülnar Quliyevanı (adı, soyadı şərtidir) vurub. Ağır xəsarətlər alan zərərçəkmiş bir neçə gün sonra müalicə aldığı Gəncə şəhərində yerləşən xəstəxanaların birində vəfat edib.
Hadisədən sonra Namiq İsayev saxlanılaraq cinayət məsuliyyətinə cəlb edilib.
