Gəncədə məktəbəhazırlıq qrupları fəaliyyət göstərəcək. Bu haqda 10 iyul tarixində Məktəbəqədər və Ümumi Təhsil üzrə Dövlət Agentliyinə istinadən xəbər veririk.
Məktəbəhazırlıq qruplarına qəbul başlayır. 11 iyul tarixində saat 11:00-dan 2024-2025-ci tədris ili üzrə ümumi təhsil müəssisələrinin məktəbəhazırlıq qruplarına qəbul üçün qeydiyyata start verilir. Qeydiyyat mektebeqebul.edu.az elektron sistemi üzərindən həyata keçiriləcək.
Azərbaycan bölməsi üzrə məktəb və müəllim seçimi 16 iyul saat 11:00-da, tədris digər dillərdə aparılan bölmələr üzrə məktəb və müəllim seçimi isə 18 iyul saat 11:00-da aktiv ediləcək.
Qeyd edək ki, məktəbəhazırlıq qruplarına cari ildə 5 yaşı tamam olan uşaqlar (2019-cu il təvəllüdlü) qəbul edilirlər. Məktəbəhazırlıq qruplarına qəbul zamanı da üstünlük hüququ tətbiq ediləcək. Şəhərimizdə Azərbaycan bölməsi üzrə 16 iyul-30 iyul tarixlərində, rus bölməsi üzrə isə 18 iyul-1 avqust tarixlərində ümumi təhsil müəssisəsində prioritet tətbiq ediləcək. Həmin müəssisələrin siyahısı mektebeqebul.edu.az saytında yerləşdiriləcək.
