Azyaşlının yoluna çıxdığı qatarın maşinisti hadisə haqda danışıb.
Qafqazinfo-nun məlumatına əsasən, insident Gəncə-Böyük Kəsik yolunda Saloğlu stansiyasının yaxınlığında baş verib. Hadisənin qəhrəmanı maşinist Sahil Əhmədlidir.
O, təhlükəsizlik üçün yolların diaqnostikasını aparan qatarı idarə edərkən körpənin relslər üzərində hərəkət etdiyini görüb. Qatar dayandırıldıqdan sonra azyaşlı dəmir yolundan uzaqlaşdırılıb və yaxınlıqda olan anasına təhvil verilib. Valideynlə dəmir yolunda uşaqları nəzarətsiz buraxmaması barədə söhbət aparılıb.
“5 saniyə geciksəydim, bədbəxt hadisə baş verəcəkdi. Çox şükür ki, qatar vaxtında dayandı. Yadda saxlamaq lazımdır ki, qatarın qarşısına qəfil çıxarkən tormozlama edilsə də, qatar 1 kilometrə qədər hərəkət edə bilər. Buna görə də vətəndaşlardan, xüsusilə valideynlərdən xahiş edirik ki, dəmir yolu ətrafında ehtiyatlı olsunlar, uşaqları nəzarətsiz buraxmasınlar”, - deyə maşinist bildirib.
Qeyd edək ki, bu ilin 8 ayı ərzində Azərbaycan Dəmir Yollarına məxsus yollarda piyadaların qəfil qatar qarşısına çıxması nəticəsində 9 insanvurma hadisəsi baş verib. Nəticədə 5 nəfər vəfat edib, 4 nəfər isə xəsarət alıb.
