"Kəpəz" futbol klubunun üzvləri Göygöl rayonunda yerləşən Heyvandarlıq Elmi Tədqiqat İnstitutunda ekoloji yönümlü sosial aksiya keçiriblər.
Gencexeber.az məlumat verir ki, tədbirin əsas məqsədi gənclər arasında təbiətə məsuliyyətli yanaşmanı təşviq etmək, ekoloji mədəniyyətin formalaşmasına dəstək vermək və heyvanlara qayğı nümunəsi göstərmək olub. Səfər çərçivəsində futbolçular institutun ərazisində ağac əkərək yaşıllığın artırılmasına töhfə veriblər. Daha sonra onlar mövcud yaşıllıq sahəsində rəngləmə işləri aparıb, abadlıq prosesinə öz dəstəklərini göstəriblər.
Ekoloji fəaliyyətlə yanaşı, futbolçular institutun təsərrüfat bölümünü də ziyarət ediblər. Burada onlar müxtəlif cinsdən olan dovşan və hinduşkaların yemlənməsi prosesində iştirak edib, heyvanlara qulluq qaydaları ilə tanış olublar. Bu müddət ərzində mütəxəssislər heyvandarlıqda tətbiq olunan gündəlik qaydalar barədə məlumat veriblər.
