Azərbaycanın ən unikal təbiət guşələrindən biri – Göygöl və onun ətrafında yerləşən Kəpəz dağı bölgəsinin zəngin mənzərələrini əks etdirən görüntülər təqdim edilib.
Gencexeber.az-a Gəncə Regional Turizm İdarəsindən verilən məlumata görə, Göygöl ətrafında 420-dən çox bitki növü qeydə alınmışdır ki, onların bir qismi nadir və endemik növlərdir. Meşələr əsasən şam, fıstıq, palıd, ağcaqayın, cökə, yemişan və qarağac ağacları ilə zəngindir. Bahar və yay aylarında göl ətrafı rəngarəng çiçək tarlaları və yaşıl çəmənliklərlə örtülərək ziyarətçilərə unudulmaz təbiət mənzərələri bəxş edir.
Bölgənin faunası da olduqca rəngarəngdir. Burada maral, cüyür, ayı, canavar, tülkü, porsuq və dələ kimi heyvanlara, həmçinin qartal, kəklik, bildirçin, bülbül və qırqovul kimi müxtəlif quş növlərinə rast gəlinir. Göl və ətraf çaylarda isə müxtəlif balıq növləri, amfibiyalar və digər su canlıları yaşayır.
Göygöl Milli Parkı ərazisində 10-dan çox ekoturizm marşrutu mövcuddur.
