Gəncənin "Kəpəz" futbol klubu Azərbaycan çempionatları tarixindəki mənfi rekordlardan birinə yenidən imza atıb.
Gencexeber.az Peşəkar Futbol Liqasının rəsmi saytına istinadən xəbər verir ki, bu, Gəncə təmsilçisinin Misli Premyer Liqasının ilk yeddi oyununda uduzması ilə mümkün olub.
1992-ci ildən keçirilən ölkə çempionatları tarixində 7-ci dəfə bir komanda startda 7 dəfə uduzub. "Kəpəz" belə halla ikinci dəfə üzləşən yeganə klubdur. Qərb təmsilçisi ötən mövsümdə də ilk 7 turu xalsız bitirib. Amma həmin vaxt (2-18) top fərqi indiki ilə (2-20) müqayisədə daha yaxşı olan gəncəlilərin ən uğursuz startı cari mövsümə təsadüf edir.
"Sarı-göylər"dən başqa Kürdəmir "Şirvan"ı 1992, Sumqayıt "Xəzər"i 1994/95, "Şəmkir" 1996/97, Quba "Şahdağ"ı 2000/01, "Şəfa" 2004/05 mövsümündə belə uğursuzluq yaşayıb.
Qeyd edək ki, 1992-ci ildə çempionatda çıxışını dayandıran "Gənclik" klubuna bütün matçlarda məğlubiyyət verildiyi üçün siyahıya daxil edilməyib.
