Ali Məhkəmədə qəsdən sağlamlığa az ağır zərər vurma və xuliqanlıqda təqsirləndirilən Akif Bəşirovun (adı, soyadı şərtidir) kassasiya şikayəti üzrə iclas başa çatıb.
Pravda.аz xəbər verir ki, hakim Vidadi Cəfərovun sədrliyi ilə keçirilən prosesdə qərar elan olunub.
İttihama görə, Akif Bəşirov sərxoş vəziyyətdə keçmiş həyat yoldaşının valideynlərinin Tovuz rayonunda yerləşən evinə gəlib, elektrik enerjisini kəsib, nalayiq ifadələr işlədib. Daha sonra avtomobillə evin darvazasını qıraraq həyətə daxil olub və keçmiş arvadı Təhminənin anası Səmayə Babazadəni maşınla vurub.
O, azyaşlı övladının gözü qarşısında keçmiş həyat yoldaşını döyüb, həmçinin hadisəyə müdaxilə edən keçmiş arvadının nənəsi Səbilə Babazadə də xəsarət alıb. Hadisə zamanı zərərçəkənlərin əmlakına da maddi ziyan vurulub.
Tovuz Rayon Məhkəməsinin hökmü ilə Akif Bəşirov Cinayət Məcəlləsinin müvafiq maddələri ilə təqsirli bilinərək 3 il 6 ay müddətinə azadlıqdan məhrum edilib.
Hökmdən narazı qalan zərərçəkmiş şəxslər və məhkumun müdafiəçisi tərəfindən apellyasiya şikayətləri verilib. Gəncə Apellyasiya Məhkəməsinin qərarı ilə apellyasiya şikayətləri təmin edilməyib. Həmin qərardan Akifin müdafiəçisi tərəfindən kassasiya şikayəti verilib.
Məhkəmə Akif Bəşirovun kassasiya şikayətini təmin etməyib.
