Gəncə Şəhər Stadionunu təmir edən fəhlələrin maaşları verilməyib. Bu haqda məlumatı 15 avqust tarixində Xezerxeber.az-a istinadən veririk.
Stadionda aparılan təmir-bərpa işlərini həyata keçirən şəxslər 5 aydır maaş almadıqlarını iddia ediblər. Həmin işçilərin sözlərinə görə, onlar dəfələrlə aidiyyəti üzrə müraciət etsələr də, istədiklərinə nail ola bilməyiblər.
Sözügedən şəxslər iddia edirlər ki, onlara verilməli olan ümumi məbləğ 57 min manat təşkil edir.
Məsələ ilə bağlı təmir-tikinti işlərini icra edən "İnşaatçı 3" MMC ilə əlaqə saxlanılıb. Şirkətdən problemin hansı səbəbdən qaynaqlandığına dair açıqlama verilməyib, lakin bildirilib ki, həftəsonunadək işçilərin əməkhaqları ödəniləcək.
