Gəncədə növbəti monitorinqlər baş tutub. Bu haqda 5 iyul tarixində İcra Hakimiyyətinə istinadən məlumat veririk.
Şəhər ərazisində qanunsuz tikintilərin qarşısının alınması istiqamətində aparılan monitorinqlər davam edir. Reydlərdə İcra Hakimiyyəti yanında Şəhərdə tikinti norma və qaydalarına riayət olunmadan aparılan tikintilərin müəyyən edilməsi məqsədilə yaradılan komissiya üzvlərinin, FHN-nin Tikintidə Təhlükəsizliyə Nəzarət Dövlət Agentliyinin Qərb Regional Mərkəzinin, Dövlət Yanğın Nəzarəti Xidmətinin Gəncə Regional Dövlət Yanğın Nəzarət İdarəsinin, o cümlədən Əmlak Məsələləri Dövlət Xidmətinin Gəncə Ərazi Şöbəsinin və hüquq-mühafizə orqanlarının nümayəndələri iştirak ediblər.
Nəticədə şəhərin F.Həsənov və Əli Nəzmi küçələrinin kəsişməsində müvafiq icazə olmadan aparılan tikinti işləri aşkarlanıb. Proses dərhal dayandırılıb və söküntüsü təşkil olunub.
Bildirilir ki, analoji tədbirlər şəhər ərazisində mütəmadi olaraq keçiriləcək.
