Gəncədə həyat yoldaşına qarşı zorakılıq etmiş şəxs həbs edilib.
Qafqazinfo.аz xəbər verir ki, şəhərin Gülüstan qəsəbəsində yaşayan qadın polisə müraciət edərək ərinin onu döydüyünü bildirib.
Aparılan araşdırmalar nəticəsində arvadını döyən şəxsin Kəlbəcər rayon sakini 1976-cı il təvəllüdlü R.Əhmədov olması müəyyənləşib. O, polis əməkdaşları tərəfindən saxlanılıb. Barəsində İnzibati Xətalar Məcəlləsinin 157 (Döymə) və 510-cu (Xırda xuliqanlıq) maddəsi ilə protokol tərtib edilib.
Saxlanılan şəxs arvadına əsəbiləşib onun başına bir şillə vurduğunu deyib. Qadın isə ərinin ona daha qəddar yanaşdığını qeyd edib: "Fevralın 18-də ərim evdə yaranmış mübahisə zamanı mənə və övladımıza qarşı nalayiq ifadələr işlətməyə başladı. Mənim başımı qolunun altına salaraq başıma 6-7 dəfə yumruq zərbələri vurdu. Bundan sonra qaçıb məhəlləyə çıxdım. O, bizi evdən qovduğu üçün oğlumla birlikdə baldızımgilə getdik. Sonra oğlumuza vatsap vasitəsilə səs göndərərək bizi söyüb təhqir etdi, öldürəcəyini bildirdi. Ərim içki aludəçisidir və içki içəndə tam fərqli bir adam olur, hətta məni və uşaqlarımızı belə öldürə bilər".
Gəncə Şəhər Məhkəməsinin qərarı ilə 50 yaşlı kişi 20 sutkalıq inzibati həbs edilib.
