Milli Qəhrəman Hökumə Əliyevaya həsr olunan "Hökumə - kədərim mənim" adlı sənədli filmin təqdimatının təxirə düşməsinin səbəbi açıqlanıb.
Filmin rejissoru, Əməkdar incəsənət xadimi Ziya Şıxlinski teleqraf.аz-a açıqlamasında bildirib ki, sənədli film gələn ilin mart ayında təqdim ediləcək:
"Filmin təqdimatı bu il dekabrın 2-də olmalı idi. Kinematoqrafçılar İttifaqının sədri Rasim Balayevin səhhətində yaranan problemə görə onu təxirə saldıq. Filmin 8 Mart Beynəlxalq Qadınlar Günü münasibətilə AzTV-də nümayişi nəzərdə tutulur. Media nümayəndələri üçün təqdimat isə televiziyada yayımlanmadan öncə Kinematoqrafçılar İttifaqında baş tutacaq. Mən bu filmi təmənnasız çəkmişəm".
Qeyd edək ki, "Hökumə - kədərim mənim" sənədli filminin təqdimatı əvvəlcə bu il avqustun sonlarına təyin olunmuş, daha sonra təqdimat dekabrın 2-ə keçirilmişdi.
Layihənin rəhbəri Azərbaycan Kinematoqrafçılar İttifaqının sədri, Xalq artisti Rasim Balayev, rejissoru Ziya Şıxlinski, operatoru Yuri Varnovski, montaj rejissoru Mübariz Nağıyev, koordinatoru Əli İsa Cabbarovdur.
Xatırladaq ki, Hökümə Əliyeva Prezident İlham Əliyevin Sərəncamı ilə "Azərbaycanın Milli Qəhrəmanı" adı ilə təltif edilib.
