Tovuzda qəbiristanlıqda həmkəndlisini döyüb öldürməkdə təqsirləndirilən Mübariz Yusifovun barəsindəki qərardan kassasiya şikayəti verilib.
Pravda.аz xəbər verir ki, şikayət Şahin Yusifovun sədrliyi ilə araşdırılacaq.
İttihama görə, təqsirləndirilən şəxs M.Yusifov 2024-cü il iyulun 1-də Tovuz rayonunun Yuxarı Öysüzlü kənd qəbiristanlığında şəhid oğlu Münasib Yusifovun məzarını ziyarətə gedərkən orada həmkəndlisi, 1958-ci il təvəllüdlü Novruz Hacıyevin heyvan otardığını görüb.
Şəhid atası ona irad tutub, qəbiristanlıqda olan heyvanları çıxaranda çomaqla təqsirləndirilən şəxsə hücum edib. M.Yusifov çomağı ondan alaraq N.Hacıyevi həmin çomaqla döyüb.
Yaralı xəstəxanaya yerləşdirilsə də, orada dünyasını dəyişib.
Faktla bağlı Tovuz Rayon Prokurorluğunda Cinayət Məcəlləsinin 126.3-cü maddəsi ilə cinayət işi başlanıb, M.Yusifov qeyd olunan maddə ilə təqsirləndirilən şəxs qismində cəlb edilərək barəsində həbs qətimkan tədbiri seçilib.
Gəncə Ağır Cinayətlər Məhkəməsinin hökmü ilə M.Yusifov 10 il azadlıqdan məhrum edilib. Gəncə Apellyasiya Məhkəməsinin qərarına əsasən, apellyasiya şikayəti təmin edilməyib.
