Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Azad Qafarzadənin (soyadı şərti) cinayət işi üzrə məhkəmə istintaqı başa çatıb.
Pravda.аz-ın məlumatına görə, hakim Dadaş İmanovun sədrliyi ilə keçirilən prosesdə hökm oxunub.
Məhkəmənin hökmü ilə o, 3 il müddətinə azadlıqdan məhrum edilib.
İttihama görə, hadisə avqustun 2-si 2022-ci il tarixdə, saat 16 radələrində Gədəbəy rayonu, Miskinli kəndinin mərkəzində qeydə alınıb.
Belə ki, Azad Qafarzadə idarə etdiyi “VAZ-21214” minik markalı avtomobili yolun sağ, nisbətən mərkəz hissəsində saxlayıb, nəqliyyat vasitələrinin hərəkətini məhdudlaşdırmaqla mobil telefonla danışıb. Bu zaman “VAZ-21060” markalı maşınla Gədəbəy rayonu istiqamətində hərəkətdə olan həmkəndlisi, zərərçəkmiş Səyavuş Quluyev siqnalından istifadə etməklə ona yolun hərəkət hissəsindən avtomobilini çıxarmasını bildirib. Azad isə əli ilə Səyavuşa yolun sol tərəfini göstərərək həmin istiqamətlə hərəkətini davam etdirməsini söyləyib. Sonra zərərçəkmiş avtomobilini sol tərəflə idarə etməklə təqsirləndirilən şəxsin maşınının qarşısında saxlayıb, yerə düşərək ona yaxınlaşıb. Səyavuş “ə küçük, niyə yol vermirsən?” kimi təhqiramiz sözlər və nalayiq ifadələr işlədib, yumruqla Azadın sifət nahiyəsinə bir neçə dəfə vurub. Daha sonra Azad maşınındakı mətbəx bıçağını götürüb Səyavuş Quluyevin ön və sol döş qəfəsi nahiyəsinə qəsdən üç dəfə zərbə endirərək ona bədən xəsarətləri yetirib.
Hadisədən sonra Azad Qafarzadə saxlanılaraq cinayət məsuliyyətinə cəlb edilib.
