Göygöl rayonunda Həşim ailə münaqişəsi zəminində yaranan mübahisə zamanı gəlini Nigara (adlar şərtidir – red.) xəsarət yetirib.
Demokrat.аz xəbər verir ki, hadisə 10 fevral 2025-ci ildə rayonunun kəndlərindən birində baş verib. Həşim yaşadıqları evdə gəlini Nigarın otağın qapısını açıq qoyması səbəbindən irad bildirib.
Aralarında şəxsi münasibətlər zəminində o, yaranmış mübahisə zamanı gəlini söyərək təhqir edib, otaqda olan baltanı götürüb və həmin baltanın sapı ilə gəlinin baş nahiyəsindən bir dəfə vurub.
Hadisəni törədən Həşimin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Həşim ona elan olunmuş ittiham üzrə özünü təqsirli bilib.
O bildirib ki, zərərçəkmiş Nigar onun oğlu Rövşənin arvadıdır: "Fevralın 10-da, təxminən saat 20 radələrində çöldən evə girən zaman, evin istiliyi üçün quraşdırılmış qaz sobası olan otağın qapısının açıq olmasını gördüm. Qapının açıq olmasına və evin soyumasına əsəbiləşdim. Bu səbəbdən onun ünvanına nalayiq ifadələr işlətdim. Bu zaman gəlinim də cavab olaraq mənim ünvanıma söyüş söydü, məni təhqir etdi. Həmin vaxt əsəbiləşərək Nigarın üstünə getdim ki, onu şillə ilə vurum. Bu zaman arvadım Südabə gələrək bizim aramıza girdi və Nigarı kənarlaşdıran zaman yerə yıxıldı. Sonra divara söykənmiş baltanın sapı ilə Nigarın başına bir dəfə vurdum. Hadisədən sonra evdən çıxıb çayxanaya getdim".
Göygöl Rayon Məhkəməsinin hökmü ilə Həşim aylıq qazancından dövlət nəfinə 15 faiz məbləğdə pul tutulmaqla 6 ay müddətinə islah işləri cəzasına məhkum edilib.
