Göygöl rayonunda 1983-cü il təvəllüdlü Mübariz adlı şəxs avtovağzal ərazisində kafe işlədən Nisə adlı qadına xəsarət yetirib.
Demokrat.аz xəbər verir ki, hadisə Mübarizin dostu Sərdarla birlikdə Nisənin kafesində pivə içməsi zamanı baş verib. Onların tanışı Əli kafeyə gələrək "hesab çatıb" deyib, lakin əslində yalnız öz hesabını ödəyib. Mübariz getmək istəyəndə Nisə ondan ödəniş tələb edib. Mübahisə zamanı Mübariz "Əli hesabı verib" desə də, Nisə bunun əksini bildirib və "yalançının balası ölsün" deyib.
Uşaqlarından biri 1-ci qrup əlil olan Mübariz bu ifadədən əsəbiləşərək qadının üzünə zərbə endirib. O, hadisədən sonra 5 manat ödəyərək kafedən gedib. Nisə zərbədən sonra dodağının şişdiyini, Mübarizin həm də qolunu sıxdığını bildirib.
Şahid Əli isə ifadəsində Mübarizgilin də hesabını ödədiyini qeyd edib.
Məhkəmənin qərarı ilə Mübariz Cinayət Məcəlləsinin 221.1-ci maddəsi (xuliqanlıq) ilə təqsirli bilinərək aylıq qazancının 15 faizi dövlətə tutulmaqla 1 il müddətinə islah işlərinə məhkum edilib.
