Göygöl rayonunda gecə saatlarından etibarən güclü qar yağmağa başlayıb.
Gencexeber.az-ın məlumatına görə, yağıntı səbəbindən rayonun Bənövşəli, Çaykənd, Göyçəkənd, Toğanalı, Zurnabad, Kərəmli və digər ucqar dağ kəndlərinə gedən avtomobil yollarında nəqliyyatın hərəkətində çətinliklər yaranıb. Sözügedən istiqamətlərdə hərəkət qismən təmin olunsa da, bəzi avtomobillər yolların sürüşkən olması səbəbindən yolda qalıb. Rayonun dağ kəndlərində qarın hündürlüyü 10–20 santimetrə çatıb.
Qeyd edək ki, Gədəbəy və Tovuz rayonlarının dağlıq və ucqar kəndlərinə də intensiv qar yağıb. Gədəbəyin Günəşli, Dəyəqarbulaq və digər ucqar kəndlərində, eləcə də Tovuzun Böyük Qışlaq kəndi və ətraf ərazilərində qarın hündürlüyü 25–35 santimetrə çatıb.
Güclü qar yağması nəticəsində bu kəndlərə gedən yollar buz bağlayıb, bu da avtomobillərin hərəkətində ciddi çətinliklərə səbəb olub.
Bundan başqa, Gədəbəy–Şəmkir avtomobil yolunda və Şəmkirin dağ kəndlərinə gedən yollarda da eyni hal müşahidə olunur.
Hazırda adıçəkilən rayonlarda qaz, elektrik enerjisi və su təchizatında fasilə qeydə alınmayıb. Bölgədə qarın yağması davam edir.
