Xəbər verdiyimiz kimi, Gəncədə yerləşən ikimərtəbəli binada təmir adı ilə edilən dəyişikliklərdən sonra sakinlərin evlərini yağış suları basır.
Gencexeber.az-a müraciət edən sakinlər bildiriblər ki, Heydər Əliyev prospekti 28, bina 2-nin dam örtüyü 6 ay əvvəl yenilənib. Onların sözlərinə görə, tikili əvvəllər normal vəziyyətdə olub və damda heç bir nasazlıq müşahidə edilməyib. Lakin aparılan "yeniləmə işləri"ndən sonra hər yağışda evlərinə su dammağa başlayıb.
Otaqların tavanı saralıb, divar kağızları batıb, divarlar rütubət içindədir.
Sakinlərin sözlərinə görə, məsələ ictimaiyyətə çatdırıldıqdan sonra yerli Mənzil İstismar Sahəsinin (MİS) əməkdaşları binaya baxış keçiriblər. Lakin problemin həlli istiqamətində addımlar atmaq əvəzinə, redaksiyamızın məsələni işıqlandırmasına etiraz edərək, sakinlərə irad bildiriblər.
Hazırda sözügedən problem olduğu kimi qalıb. Vətəndaşlar aidiyyəti qurumlara müraciət edərək, dam örtüyündə yaranan nasazlığın aradan qaldırılması üçün təcili tədbirlər görülməsini xahiş ediblər.
