El arasında Savalan adı verilən, lakin rəsmi adı isə hələ də bilinməyən Gəncə şəhərində yerləşən qəsəbə 19-cu əsrin sonlarını xatırladır desək, heç də yanılmarıq. Yolsuzluq şəraiti, dərəli yollar, su qıtlığı və məişət tullantıları arasında itib-batan yaşayış massivində məskunlaşan sakinlər zülm çəkirlər.
Məsələ ilə bağlı Gencexeber.az -a şikayət ünvanlayan sakinlərin sözlərinə görə, qəsəbənin ən ciddi problemlərindən biri içməli sudur:
"Özümüz 15 gündən bir sifarişlə qəsəbəyə su gətizdiririk. Yağış suyunun ümidinə qalmışıq desək daha doğru olar. Yollar o qədər bərbat vəziyyətdədir ki, Təcili Tibbi Yardım maşını belə qəsəbəy girmir. Məktəbə və işə getmək üçün kilometrlərlə yolu piyada getməli oluruq. Çünki ərazidə marşrut xətti yoxdur. Dəfələrlə Gəncə Şəhər İcra Hakimiyyətinə və Gəncə Şəhər Nizami Rayon Bələdiyyəsinə müraciət etsək də, problem hələ də həllini tapmayıb. Biz unudulmuşuq. Ümid qalır Allaha – haçan yağış yağar, suyumuz olar".
Məsələ ilə bağlı Gəncə Şəhər "Sukanal" İdarəsindən bildirilib ki, qurum qəsəbəyə xidmət göstərmir.
Qeyd edək ki, Savalan qəsəbəsində təxminən 100-dən çox ailə yaşayır. Əsasən ətraf rayonlardan gələn sakinlər bu qəsəbədə məskunlaşıblar.
