Gəncə şəhərində fəaliyyət göstərən özəl uşaq bağçalarında nəzarətin zəif olması ilə bağlı valideynlərin narazılıqları artmaqdadır.
Valideynlər Gencexeber.az-a bildiriblər ki, son vaxtlar özəl bağçalarda uşaqların bir-birini qısnaması və zorakılıq halları artıb, bunun qarşısını alan isə yoxdur.
Onların sözlərinə görə, müxtəlif səbəblərdən övladlarını dövlət bağçalarına yerləşdirə bilməyən ailələr özəl bağçalara üz tutur. Lakin aylıq ödənişlərə baxmayaraq, nəticə əldə edilmir – xüsusilə uşaqların davranışına nəzarət və təhlükəsiz mühitin təmin edilməsi – bir çox halda özünü doğrultmur.
Gəncə sakini olan iki övladlı valideyn bildirib ki, onun bir uşağı dövlət bağçasına gedir. Valideyn iddia edir ki, dövlət müəssisəsində uşaqlar arasında xoşagəlməz hal baş verən zaman əməkdaşlar dərhal müdaxilə edir, sükut pozan uşaqlarla ayrıca məşğul olur və problemin böyüməsinin qarşısını alırlar.
Lakin özəl bağçaya gedən digər övladı dəfələrlə həmyaşıdları tərəfindən zorakılığa məruz qalsa da, bağça rəhbərliyi tərəfindən adekvat reaksiya verilmir.
Məlumat üçün bildirək ki, bir neçə gün əvvəl şəhərin Eminbəyli küçəsi, 28 ünvanında yerləşən "Kuki Kids" uşaq bağçasında xoşagəlməz hadisə baş verib. Valideynin 4 yaşlı övladı iki həmyaşıdı tərəfindən döyülüb.
Təqdim olunan videogörüntülərdən də aydın görünür ki, hadisə anında otaqda nə tərbiyəçi, nə baxıcı, nə də digər nəzarətçi olub. Uşaqlar arasında yaranan konfliktin qarşısını almaq, onları ayırmaq və ya nizam-intizam yaratmaq üçün heç bir müdaxilə edilməyib.
Şikayətçi valideyn qeyd edib ki, bu hal ilk dəfə deyil və uşaq artıq psixoloji sarsıntı keçirib və məsələ ilə bağlı bağçanın rəhbərliyinə müraciət etsə də, problemin həlli istiqamətində zəruri addımlar atılmayıb:
"Məni həmin uşaqlardan birinin valideyni ilə əlaqələndirdilər, üzr istədilər. Amma məsələ bununla bitmir. Mənim uşağım birinci dəfə deyil ki, yıxılır, vurulur. Başı stola dəyə bilərdi. Hər dəfə də nəzarətçi yerində olmur."
Valideyn həmçinin iddia edib ki, özəl bağçalardakı psixoloqlar zorakılığa meylli uşaqlarla fərdi məşğul olmur, onlar ümumi qrupdan kənarlaşdırılmır və davranış korreksiyası üçün işlər görülmür.
