Gəncə şəhər Mənzil Kommunal Təsərrüfatı İstehsalat Birliyinin Yaşıllaşdırma şöbəsi tərəfindən şəhərin ekoloji tarazlığının qorunması, həmçinin yaşıllıq zolaqlarının artırılması məqsədilə növbəti gül əkini aksiyası həyata keçirilib.
Gencexeber.az bildirir ki, yaşıllaşdırma kompaniyasının bu dəfəki ünvanı Gəncə şəhər İcra Hakimiyyətinin inzibati binasının ərazisində yerləşən, Dövlət Bayrağının ətrafı və yaxınlığında yerləşən buta formaları və güldanlar olub.
MKTİB-nin Gülçülük sahəsində becərilən primula güllərinin təyin olunan yerlərə əkini aparılıb. Bitkilərin daha uzunömürlü olması üçün əkindən öncə ərazilər ömrünü bitirmiş gül kollarından təmizlənib, torpaq, torf və müxtəlif gübrələrlə zənginləşdirilib. Aksiya çərçivəsində mövcud yaşıllığa aqrotexniki qulluq göstərilib, ərazinin suvarılması təmin edilib.
Qeyd edək ki, mülayim hava şəraiti nəzərə alınaraq, şəhərin müxtəlif yerlərinə mövsümü güllərin əkini davam etdiriləcək.
