Gəncədə hotelin qarşısı piyadaların hərəkəti üçün faktiki olaraq bağlanıb.
Gencexeber.az-a uzun müddətdir daxil olan şikayətlərə əsasən, sözügedən hal şəhərin mərkəzində – Cavad xan küçəsi, 50 ünvanında, "V&GO" hotelin qarşısında müşahidə olunur.
Belə ki, vətəndaşların sərbəst hərəkəti üçün nəzərdə tutulan piyada sahəsi avtomobillərin dayanacağına çevrilib. Hotelin qarşısı və hər iki tərəfi dibçəklər, zibil qabları və dekorativ çəpərlərlə qapadılıb. Nəticədə piyada zolağı daraldılıb və sakinlərin hərəkəti çətinləşdirilib.
Şəhərin ən işlək və mərkəzi hissəsində yerləşən ərazidə bu cür məhdudiyyətlərin tətbiqi xüsusilə yaşlılar, uşaqlı ailələr və fiziki məhdudiyyətli şəxslər üçün əlavə problemlər yaradır.
