Gəncə şəhərində 1979-cu il təvəllüdlü Vüsal Əsgərov şəxsi münasibətlər zəminində yaranan mübahisə zamanı tanışı Araza xəsarət yetirib.
Demokrat.аz xəbər verir ki, hadisə 26 avqust 2024-cü ildə şəhərin Azərbaycan Bayrağı küçəsində yerləşən "Dubay bazarı" adlanan bazarda baş verib.
Vüsal orada Arazın onun ünvanına nalayiq ifadələr işlətməsini bəhanə edib və bıçaqla onun döş qəfəsinə zərbə vurub.
Hadisəni törədən Vüsalın barəsində Cinayət Məcəlləsinin bir neçə maddələri ilə ittiham elan edilib.
İş üzrə ifadə verən Vüsal ona elan olunmuş ittiham üzrə özünü qismən təqsirli bilib. O, ifadəsində göstərib ki, Arazı təxminən 1 ildir tanıyır, o da bazarda göy-göyərti satır, aralarında münasibətləri yaxşı olub, heç bir ədavət və düşmənçiliyi yoxdur: "Hadisə günü saat təxminən 14:00-da işlədiyim yerdə yemək yeyirdim. Yemək yeyən zaman spirtli içki, yəni təxminən yarım litr meyvə arağı da qəbul elədim. Həmin vaxt tək yemək yesəm də, şərikim Seymur yanımda idi. Seymur meyvə satan zaman yeyib içmişəm. Daha sonra yemək yedikdən sonra qonşuluqda meyvə satan Rauf adlı şəxslə meyvələrin qiyməti barədə söhbət edən zaman orada olan Araz yanımıza gəldi. Daha sonra ani bir anda Raufla aramızda mübahisə yarandı. Mənə əl ataraq, təhqir etdi. Arazın qardaşı Arzu və Rauf bizi aralaşdırdılar və biz bir-birimizdən uzaqlaşdıq".
Təqsirləndirilən şəxs qeyd edib ki, daha sonra öz işlədiyi yerə gedib: "Araz isə öz dəzgahının arxasına getdi. Aradan təxminən 15 dəqiqə keçdikdən sonra əsəbləşdiyim üçün, həm də Arazın məni təhqir etməyini qəbul edə bilmədiyim üçün özümü saxlaya bilmədim və işlədiyim yerdə olan meyvə bıçağını götürərək onun yanına doğru getdim. Arazın yanına çatan zaman ani məqamda onun sol döş qəfəs nahiyyəsindən bir dəfə bıçaqla zərbə vurdum. Araz bir qədər arxa-arxaya getdi və əli ilə sinə nahiyəsini tutaraq oradan uzaqlaşdı".
Bu cinayət işinə Gəncə Ağır Cinayətlər Məhkəməsində baxılıb. Məhkəmənin hökmü ilə Əsgərov 8 il azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.
