Gəncədə sahibsiz itlər narahatlıq yaradır.
Gencexeber.az-a şəhər sakinləri tərəfindən demək olar ki, hər gün sahibsiz itlərin davamlı hücumlarına məruz qalmaları ilə bağlı şikayətlər daxil olur. Sözügedən hallar şəhərin hər bir tərəfində baş verir.
Vətəndaşların sözlərinə görə, dördayaqlılar məktəbə gedən şagirdlərdə qorxu və həyəcan hissi yaradırlar. Onlar küçələrdə rahat hərəkət edə bilmədiklərini, uşaqların, yaşlıların və qadınların təhlükə ilə üzləşdiklərini bildiriblər.
Əlavə edilib ki, sahibsiz itlərin dəstə halında küçələrdə dolaşması həm gündəlik gediş-gəlişdə çətinliklər yaradır, həm də insanlarda qorxu hissi doğurur. Vətəndaşlar şəhər rəhbərliyindən problemin həllinə dərhal müdaxilə edilməsini arzu ediblər.
Qeyd edək ki, Gəncədə 2023-cü ildə yaradılan "Yuva" heyvan sığınacağı ötən ilin yanvarında maddi çatışmazlıqlar səbəbilə fəaliyyətini dayandırıb. Həmin sığınacaqda saxlanılan itlərin bir çoxu isə şəhər ərazisinə buraxılıb.
Hazırda Gəncədə sahibsiz heyvan problemi aktuallığını qoruyur.
