Azərbaycan Respublikası Prezidentinin fərdi təqaüdçüsü, Xalq artisti Şahnaz Haşımova Mədəniyyət Nazirliyinin nəzdində fəaliyyət göstərən Bədii Şura tərəfindən "Məhsəti" qısametrajlı bədii filminin Bakı Film Festivalında nümayişinə qoyulan qadağadan sonra ictimaiyyətdə yaranmış müzakirələrə münasibət bildirib.
Xanım sənətkar Gencexeber.az-a açıqlamasında qeyd edib ki, Azərbaycanın dünya şöhrətli görkəmli ziyalısı, böyük şairə Məhsəti Gəncəvi haqqında çəkilən həmin film cəmiyyətdə yanlış təsəvvürlərin formalaşmasına səbəb olub. Onun sözlərinə görə, belə yanaşma yolverilməzdir.
"Məhsəti sözünün mənası "böyük xanım" deməkdir. Şairə layiq olduğu üçün ona bu yüksək ad verilib. Gəncədə yaşamaq, gəncəli olmaq isə şərəfdir, fəxr hissidir!" – Xalq artisti Şahnaz Haşımova bildirib.
Qeyd edək ki, filmin qadağa olunması rejissor və ssenari müəllifi Suad Qara tərəfindən hazırlanan filmdə ədəbiyyat irsimizə hörmətsizlik nümayiş olunması ilə əlaqələndirilib. Bədii Şura tərəfindən bildirilib ki, Azərbaycanın klassik ədəbi-mədəni tarixində xüsusi mövqeyə malik olan Məhsəti Gəncəvi obrazının bədii təqdimatında ciddi təhriflərə yol verilib, etik-normativ çərçivələrə açıq etinasızlıq nümayiş etdirilib, filmdə görkəmli şairə Məhsəti Gəncəvi gəzəyən əxlaqsız qadın kimi təqdim edilib.
Eləcə də, obrazın mənəvi kimliyi ilə təqdim edilən səhnə və situasiyalar arasında nəzərəçarpacaq dərəcədə kobud uyğunsuzluqlar qeydə alınıb.
