Respublika Prokurorluğunda mühüm işlər üzrə baş müstəntiq işləmiş hüquqşünas, tovuzlu detektiv yazıçı Müşfiq Abbasov bir gün Gəncədən qayıdarkən yaşadığı bir hadisəni sosial şəbəkə hesabında bölüşüb.
Gencexeber.az bildirir ki, M.Abbasov onun üçün ölümə belə gedəcəyini deyən sürücüsünü sınamaqdan ötrü maraqlı addım atıb.
"Bir sürücüm vardı, həmişə mənə deyirdi ki, "rəis, sizdən ötrü ölümə gedərəm". Deyirdim, a kişi, sözdür də, deyirsən. And içirdi ki, sizin sözünüz qanundur mənim üçün... Günlərin birində Gəncədən gəlirdim. Avtomobili özüm idarə edirdim. Birdən-birə ağlıma gəldi ki, bəlkə bu sürücümü sınayım.
Nömrəsinə zəng edib bir az həyəcanla dedim ki, "Gəncədən gələndə yolda bir qadını avtomobillə vurmuşam, şükür, ölüm-itim yoxdur, sadəcə qadının ayağı sınıb. Sən təcili gəl bura. Guya avtomobili sən idarə etmisən. Mən vəzifə adamıyam, işimdə problem olar. Amma səni qurtarmaq asandır, bütün məsələləri özüm həll edəcəm. Yetər ki, sən de ki, maşını mən idarə etmişəm". Gördüm ki, telefonun o biri başından səs çıxmır. O bir az da duruxub dedi ki, "rəis, mən bunu edə bilmərəm, mənlik deyil". Ona görə də böyür-başınızda olan adamların bu cür sözlərinə həmişə şübhə ilə yanaşın və bilin ki, siz büdrəyəndə həmin pafoslu söz sahibləri buxarlanıb yoxa çıxacaqlar…", - tovuzlu detektiv yazıçı qeyd edib.
