Gəncədə satılan konfetlərin qurdlu çıxması azmış kimi, mağaza əməkdaşının cavabı narazılıq doğurub.
Gencexeber.az-a daxil olan şikayətə əsasən, Gəncə şəhər sakini yanvarın 2-də "OBA Market" şəbəkəsinin Poçt qəsəbəsində, 40 nömrəli körpələr evi–uşaq bağçasının yaxınlığında yerləşən mağazasından aldığı "Kiki Riki" markalı konfetlərin hamısının qurdlu olduğunu iddia edib.
Vətəndaşın sözlərinə görə, o, təxminən 300 qram aldığı konfetlərin çox hissəsi azyaşlı uşaqları tərəfindən yeyildikdən sonra məhsulun yararsız olduğunu görüb. Ertəsi gün mağazaya müraciət edən sakin narazılığını bildirsə də, mağaza əməkdaşının "Qurdlardan hələ zəhərlənən olmayıb" ifadəsi ilə cavab verməsi vəziyyəti daha da gərginləşdirib.
Şikayətçinin iddiasına görə, ödənilən məbləğ geri qaytarılmayıb, əvəzində eyni həcmdə konfetlə dəyişdirilməsi təklif olunub.
Məsələ ilə bağlı redaksiyamız ölkə üzrə 1400-dən çox filialı fəaliyyət göstərən "OBA Market" şəbəkəsi ilə əlaqə saxlayıb. Şirkətdən Gencexeber.az-a bildirilib ki, şikayətçinin ödədiyi məbləğin tam şəkildə geri qaytarılması nəzərdə tutulur.
Lakin mağaza əməkdaşının vətəndaşın haqlı narazılığına hansı əsasla kobud və məsuliyyətsiz yanaşma nümayiş etdirməsi ilə bağlı rəsmi izahat verilməyib.
