"Gəncədə əhalinin gündəlik məişət tullantılarının atılması üçün nəzərdə tutulan müxtəlif tutumlu konteynerlər və zibil qutuları çox təəssüf ki, bəzi vətəndaşlar tərəfindən yandırılır".
Bu barədə Gencexeber.az-a Mənzil Kommunal Təsərrüfatı İstehsalat Birliyi (MKTİB) tərəfindən məlumat verilib.
"Növbəti belə bir fakt Dədə Qorqud küçəsində aşkar olunub. Əraziyə yerləşdirilən yeni 3 ədəd iri tutumlu plastik zibil konteynerləri gecə saatlarında naməlum şəxs və ya şəxslər tərəfindən yandırılaraq tamamilə yararsız hala salınıb. Uzun müddət istifadəyə yararlı olan bu konteynerlərin məsuliyyətsiz insanlar tərəfindən yandırılması birmənalı olaraq yolverilməzdir.
Ümumiyyətlə şəhərin müxtəlif ərazilərində zibil qutularının yandırılması həm şəhərin ekoloji tarazlığına mənfi təsir göstərir, həm də sakinlərin gündəlik istifadəsində olan tutumların yararsız hala düşməsinə gətirib çıxarır. Gəncə şəhər Mənzil Kommunal Təsərrüfatı İstehsalat Birliyi (MKTİB) əhaliyə bir daha müraciət edərək bildirir ki, qurumun texnikaları tərəfindən gündəlik boşaldılması və daşınması həyata keçirilən konteynerləri yandırmasınlar. Bu kimi hallara yol verən vətəndaşlar aşkar olunaraq inzibati qaydada məsuliyyətə cəlb olunacaqlar" – MKTİB qeyd edib.
