Gəncədə zavod rəhbərliyi zəhərli tüstü ilə bağlı sakinlər tərəfindən səsləndirilən iddiaları təkzib edib.
Gencexeber.az-a açıqlama verən "SemSan" zavodunun direktoru Samir Heydərov havanın çirkləndirilməsini təsdiq etsə də, bunun müəssisənin fəaliyyəti ilə heç bir əlaqəsinin olmadığını bildirib. S.Heydərov qeyd edib ki, havaya buraxılan zəhərli tüstünün mənbəyi yaxınlıqda fəaliyyət göstərən alüminium məhsulları emalı sexidir.
"Mən özüm də onlardan şikayətçiyəm. Onların havaya buraxdığı zərərli tüstü mən daxil, bütün şəhər sakinlərini zəhərləyir. Lakin bizlə heç bir əlaqəsi yoxdur. Havanı biz korlamırıq…", – S.Heydərov əlavə edib.
Qeyd edək ki, vətəndaşlar bir müddət öncə Gəncənin Zülfü Hacıyev küçəsində yerləşən "SemSan" zavodunun havaya buraxdığı zəhərli tüstüdən ətraf küçələrdə yaşayan sakinlərin əziyyət çəkdiklərini iddia ediblər.
