Gəncə şəhərində Heydər Əliyev və Şah İsmayıl Xətai prospektlərinin kəsişməsində yol üzərində çəkilmiş istiqamətləndirici nişan sürücülərdə çaşqınlıq yaradaraq cərimələnmələrə səbəb olur.
Gencexeber.az-a daxil olan çoxsaylı şikayətlərə əsasən, sözügedən yol nişanı ilkin mərhələdə asfalt üzərinə çəkilərkən sürücülərə həm düz hərəkət etməyə, həm də sola dönməyə icazə verirdi. Lakin ötən ilin noyabr ayında avtomobil yollarında aparılan yenidənqurma işləri zamanı həmin istiqamətdə düz hərəkət qadağan edilib, yalnız sola dönməyə icazə verilib və düz hərəkəti göstərən hissə qaraldılıb.
Buna baxmayaraq, günün müəyyən saatlarında qarşıdan düşən günəş şüaları səbəbindən sürücülər nişanı yenə də "düz və sola" kimi görürlər. Nəticədə yenilənmiş qaydanı bilmədən düz hərəkətini davam etdirən sürücülər 3 bal və 100 manat məbləğində cərimələnirlər.
Problemi daha da çətinləşdirən məqam odur ki, nişanın düzgün oxunması üçün sürücünün ona tam yaxınlaşıb diqqətlə baxması tələb olunur. Hərəkət zamanı sürəti kəskin şəkildə azaldaraq yol nişanını ayırd etməyə çalışmaq isə həm təhlükəlidir, həm də real şəraitdə mümkün deyil.
Sürücülər mövcud vəziyyətin aradan qaldırılması, yol nişanının daha aydın formada yenilənməsi və ya əlavə şaquli nişanların quraşdırılmasını xahiş edirlər.
