Gəncədə yaşlı bir qadın səhər saatlarından etibarən küçədə sahibsiz və çaşqın vəziyyətdə qalıb.
Gencexeber.az-a daxil olan məlumata görə, ahıl qadın bu gün Gəncə şəhəri 36 nömrəli tam orta məktəbin yaxınlığında, Krılov küçəsində evlərin qapılarını döyərək ailəsini axtardığını bildirib. Onun yaddaş problemi yaşadığı, haralı olduğunu xatırlamadığı deyilir.
Şəhər sakinlərindən biri redaksiyamıza bildirib ki, qadın əvvəlcə yaddaşını itirdiyini, daha sonra isə guya evindən qovulduğunu söyləyib. O, ərazidə yaşayan insanlardan dəfələrlə kömək istəyərək "məni evə salın, haralı olduğumu bilmirəm" deyə xahiş edib.
Hadisə ilə bağlı sakinlər tərəfindən polisə də müraciət edildiyi bildirilir. Lakin hazırda qadının hər hansı qohumu və ya yaxın tanışı ortaya çıxmayıb. Yaşlı qadın hal-hazırda da həmin ərazidə — küçədə oturmuş vəziyyətdə qalır.
Videoda gördüyünüz qadını tanıyanlardan və barəsində məlumatı olanlardan redaksiyamızın sosial şəbəkə hesablarına yazaraq məlumat vermələri xahiş olunur.
