Gəncə şəhər Mənzil Kommunal Təsərrüfatı İstehsalat Birliyinin (MKTİB) Yaşıllaşdırma şöbəsi tərəfindən payız mövsümü ilə əlaqədar olaraq park və xiyabanlarda, eləcə də yol və prospekt boyu mövcud olan ağacların budanması, həmçinin ömrünü başa vuran və təhlükə mənbəyinə çevrilən ağacların kəsilərək ərazidən götürülməsi işləri görülüb.
Gencexeber.az bildirir ki, qurumun canlı qüvvəsi və texnikası vasitəsilə şəhərin prospekt və küçələrində yol nişanlarının, eləcədə işıqforların görünüş dairəsini məhdudlaşdıran, eləcə də istirahət məkanlarında insanların rahatlığına və hərəkətinə maneə yaradan ağacların qol və budaqları kəsilib.
Analoji işlər əsasən Gəc Zavodunun ətrafında, Heydər Əliyev və Atatürk prospektində, Dadaş Bünyadzadə, Ordubadi, Üzeyir Hacıbəyov küçələrində həyata keçirilib.
Bundan başqa MKTİB-nin Yaşıllaşdırma şöbəsi şəhərin şərq istiqamətindəki magistral yolun sağ və sol hissəsində ağac əkini aparıblar. Belə ki, ərazidə qurumuş ağaclar çıxarılaraq yeni tinglər əkilib, mövcud yaşıllığın suvarılması təmin edilib.
