"Azərbaycan Dəmir Yolları" QSC-nin Gəncə lokomotiv deposunun baş mühəndisi Tərlan Əhmədovun idarə etdiyi, müəssisəyə məxsus "77-VL-473" dövlət qeydiyyat nişanlı avtomobillə fevralın 13-də yol-nəqliyyat hadisəsi törətdiyi iddia olunur.
Gencexeber.az-ın məlumatına görə, hadisə şəhərin qeyri-rəsmi olaraq "Depo qəsəbəsi" adlandırılan ərazisində baş verib. İddia olunur ki, avtomobil işıq dirəyinə çırpılıb. Zərbənin təsirindən həm nəqliyyat vasitəsi, həm də işıq dirəyi yararsız hala düşüb.
İddialara görə, baş verən hadisə "Azərbaycan Dəmir Yolları" QSC-nin Gəncə lokomotiv deposunun rəhbərliyi tərəfindən gizlədilməyə çalışılıb və sözügedən şəxs barəsində qanunamüvafiq tədbirlər görülməyib.
Məsələ ilə bağlı redaksiyamızın sorğusuna cavab olaraq Daxili İşlər Nazirliyinin Mətbuat Xidmətinin regional qrupunun baş inspektoru Eşqin Qasımov bildirib ki, fevralın 13-də Gəncə şəhəri ərazisində dəmiryolu xəttinin yaxınlığında yol-nəqliyyat hadisəsinin baş verməsi və sürücünün hadisə yerini tərk etməsi barədə polisə məlumat daxil olub.
Onun sözlərinə görə, polis əməkdaşları tərəfindən aparılan araşdırmalar zamanı hadisəni törədən şəxsin həqiqətən Tərlan Əhmədov olduğu müəyyən edilib: "Araşdırma zamanı sürücünün qəza baş verən vaxt sərxoş vəziyyətdə olduğu da aşkarlanıb".
Faktla bağlı araşdırma aparılır.
