Gəncənin Cavad Rəfibəyli ilə Təbriz küçələrinin kəsişməsində yaranmış vəziyyət artıq səhlənkarlıq həddini keçərək açıq təhlükəyə çevrilib.
Gencexeber.az-ın məlumatına görə, sözügedən ərazidə lüklərin üstü qazılaraq açıq şəkildə saxlanılıb. Nəticədə yolun asfalt örtüyü təxminən 20 santimetr dərinlikdə çökək vəziyyətə düşüb. Hərəkətdə olan avtomobillərin təkərləri qəfil həmin çalalara düşür, nəticədə asqı sistemlərinə ciddi zərbə dəyir, şinlər partlayır, disklər deformasiyaya uğrayır.
Təkcə son iki gün ərzində təxminən 30-a yaxın sürücü redaksiyamıza müraciət edərək avtomobillərinə ziyan dəydiyini bildirib. Bu isə artıq təsadüfi hal deyil, sistemli məsuliyyətsizliyin nəticəsidir.
Sürücülər haqlı olaraq sual edirlər: əgər burada təmir və ya yenidənqurma işləri aparılırsa, niyə əvvəlcədən xəbərdaredici nişanlar, işıqlandırma, müvəqqəti təhlükəsizlik baryerləri quraşdırılmayıb? Niyə vətəndaşların əmlakı və təhlükəsizliyi bu qədər ucuz hesab olunur?
"İnsan necə məsuliyyətsiz olmalıdır ki, iş görür, amma heç bir nişan qoymur? Maşına elə zərbə dəyib ki, arxa oturacaqda əyləşən həyat yoldaşımın başı qapıya çırpılıb. Buna görə kim cavab verəcək?" – zərərçəkmiş sürücülərdən biri maşın təmiri sexində deyib.
Əldə etdiyimiz məlumata görə, qazıntı işləri "Azərsu" ASC-nin sifarişi ilə Gəncə şəhərinin içməli və çirkab su xətlərinin yenidən qurulmasını həyata keçirən "Maqro Construction" MMC tərəfindən aparılır.
Vətəndaşlar aidiyyəti qurumların məsələyə dərhal reaksiya verməsini tələb edirlər.
